Songtexte

Hiä ämbrüächa inär Heji
wa di Deerfjini anu Tschuggä chläbunt
und allärlei gschpässigi Gstaltä läbunt
inär Heji, wa Boozä und Geischtär iru Uwäsu triibunt
und d' altigsässnu Lit, unnär irusgliichu bliibunt
da bstimmt d' Natür ubär z' Läbu und där Tod
da zellt mu bim Abusitz va altu Zytä und eu va grossär Not
soll z' värwännt Nooluvolch nummu riäwig drubär lachä
und schich witär Gidankä ubär glitzrigs und gläntzunds machu
äs sind de d' erschtu wa räwwjunt
wenn z' Wässärbiäli nimmä z' brüchu isch
und d' letschtusch Glüät ufär Trächa ärlischt
wennu d' Horlowwana z' Giägji nimmt
und z' Chooru därväfligt mim Wind
vili bsinnunschi de an d' Ur-Chraft wa git und wa nimmt
und wa d' Richtig vam Läbe bstimmt
d' Chraft wa alls durchdringt
äs Liäd wa in iisch allu singt...

Gschpirrsch dü die Chraft, än heiligi Macht
üs där teifi va där Ärda
püüri Energie, durchfliätut mi
än Urgwalt, so gufäralt

Gschpirrsch dü die Chraft, än heiligi Macht
där Atum va du Bärgä
bringt Schnee und Rägu, isch Flüäch und Sägu
äs ginntischs Chind, isch där stürmisch Wind

In minu Adrä fliässt äs Bächji
in minum Härzu brännt äs Fiir
di Guxa blast üs där Schnurra
üs Steub und Äscha bsteh wiär
…uf dischär Ärda steh wiär

Gschpirrsch dü die Chraft, än heiligi Macht
bränn, o bränn ewigs Fiir
allpott in Värwandlig, heiss und lebändig
wild und unbändig

Gschpirrsch dü die Chraft, än heiligi Macht
äs Bächji ohni Afang ohni Änd
schliifut di Tschuggä, nimmt z Hab und Güät
isch Läbunsquell, isch pulsiärunds Blüät, pulsiärunds Blüät

Das isch d' Ur-Chraft wa git und wa nimmt
wa d' Richtig vam Läbu bistimmt
d‘ Chraft wa alläs durchdringt
äs Liäd wa in iisch allu singt

Sunna, Mond und Stärnä
durchwandrunt ds Firmamänt
Mänsch, Tiär und Pflanzä
und alls wa läbt uf der Wält
Folgt uraltu Bahnä, folgt uraltu Gsetz
in dischum Momät, im Hiä und im Jetz

Mit bluttu Tschebjä leufutsch
ufum Gletschäriisch
treit mehbessri Schträtschä chriduwiiss
Än Purscht ärlickt di Gstalt und freegt:
"Wa willt eu hi?"
schi schlottrut und brillut uhefli, uhefli

Wa bini hiä, was soli da
was isch de mit miär los?
minä Liib liggt uf där Pritscha läblos
Wa bini hiä, was soli da
was isch das vär äs Loos?
mini Seel, värirrt schi hoffnigslos, hoffnigslos

Än jungi, wundärschöni Froww
im silbrigu, chaltu Monduschii
Liäbi uf dä erschtusch Blick isch das gsi
wa där Pifful d' arum Seel het gseh
...äs het schi niähmeh, mit schiinu Eugu gseh

Zu Läbzytä än Mejtja, üs steiriichum Hüs
jetzt geischtrutsch, durch z' Tälli i und üs
Värzwiiflut süächt där Purscht, d‘ hibsch Mailändäri
isch im Gejfätsch värschwundu und chunnt niämeh, niähmeh
...äs het schi niähmeh gseh

Wassär frisst Land…
…üs där Teifi heurts
Hiä isch än Port zwischu Läbu und Tod

…und där Sumpf ärwacht
hiä opfrä wiär in teifschtär Not

…än heiligi Nacht
hiä fiirä wiär iischäs Opfärfäscht

…und där Sumpf lacht
Hiä gäbä wiär iischä letschtusch Räscht
bi iischum Fäscht, iischä letschtusch Räscht, bi iischum Fäscht

Wenn d‘ Chräft iisch verlehnt
di Zeichu Schlächt stehnt
wenn z‘ Fiir wiätut und z‘ Volch bliätut
hiä bi där Port zwischu Läbu und Tod
opfrä wiär in teifschtär Not
was hertär isch als Stei, schniidut z' Fleisch vam Bei
dar Chrüäg geit zum Brunnu bisär bricht
där Sebul stächt, bis d‘ Chlinga brächt
so scheichä wiär iischu Ahnä, heiligi Gabä, heiligi Gabä, heiligi Gabä

Wassär frisst Land...
...där Morascht pulsiärt
Hiä bi där Port zwischu Läbu und Tod

...und d' Luft vibriärt
hiä opfrä wiär in teifschtär Not

...und z‘ Blüät värrinnt
so fiirä wiär iischäs Opfärfäscht

...und z‘ Lütra grinnt
Hiä gäbä wiär iischä letschtusch Räscht
bi iischum Fäscht, iischä letschtusch Räscht, bi iischum Fäscht

Än Stimm schnurrt in minum Grind
graaglu z' Chrächji ämbrüf ganz gwschind
uf flinggu Bei, ubär Stäcku und Stei
folg ich där schüdärhaft Stimm

Ufum Tschuggu beitut ds Ibul
Het kheuru ich sellä chu
jetz ghaltuts schi im Näbul
bini blind odär gsehni nu, gsehni nu?

So steisch dü da vor miär
mit äschubleichum Gsicht
und ich weiss äs isch nummu än Treum
will mär z‘ Härz, därbii zärbricht

Hesch gseit ich sellä bliibu
nit du Stimmä nah
hesch gseit ich sellä bliibu
treu an dinär Sita stah
nit du Stimmä nah
an dinär Sita stah

Secklu z‘ Chrächji ämab uf flinggu Tschaggä
ob miär, choluschwarzi Gaggä
där Schattu chunnt mär nah
uf Schritt und Tritt, laht mi niämeh lagah

Mugsmüsjistill, bini teub?
inu Chnochä und im Steub
finnich eis va dinu goldigu Haar
värstrichu sind hunnärt Jahr

Quatämbärchind inär Tämpärnacht giboru
kei Mänsch het je äs Wortji drubär värloru
Quatämbärchind danaubär duheimu
va värstorbnu und ungibornu tüäsch dü treumu

Äs liäsligs Flüschtra üs där dunklu Schroota
das isch än Boozu va där iblu Sorta
mit züänu Eugu und stockfiischträr Nacht
z' Quatämbärchind ärlickt där Totu
und lacht und lacht und lacht

Quatämbärchind dü wandrusch zwischu du Wältä
schnurrsch mit Boozä, Geischtär himmultrürigu Gstaltä
Quatämbärchind dü weisch was nit mängä värsteit
där Priis isch äs Dasii in Einsamkeit, in Einsamkeit

Totugeischt ich redunti a
abär z' erscht und z' letschtusch Wort wili ha
säg dü miär wiäs um iisch steit
wenn d' Seel uf d‘ annär Sita geit

Quatämbärchind nimm mini Hand
und chum mit miär ins Annärschland
ich zeigu diär wiäs um ew steit
wenn d' Seel uf d‘ annär Sita geit
wenn z' Fleisch värfühlt, müäsch dü gah
in d' Unnärwält, du Wurzlä nah
zrug inä Schooss, vadär Müätär Ärda
vadär Müätär Ärda

Där Liib isch gchnächtut mit Värgänglichkeit
d‘ Seel ärinnrut schi and d‘ Ewigkeit
widärgiboru üs där Dunkulheit
dum Liächt entgägu in d‘ Unändlichkeit

Mit schalüsu Eugu bschowwsch nisch
und mit gspaltnär Zunga redsch
ubär iischi Sippa schgattusch
ziähsch nisch alli in dis Nätz

Ins Nätz va Lugi und Värrat
agitribu va Värgüüscht
z' Beescha zeigt schi inär Tat
värflüächt sig dini Chüüscht

In iischäs Tälli bringsch dü z' Eländ
und Brüädär chriägt gägu Brüädär
nummu wills dich värzännt, na dem wa diär nit khert
Hesch nisch alli ins Värdärbu gchert

Im Namu vadu Gettär, du Geischtär und vam Land
rinnut diis choluschwarz Blüät, durch iischi mordund Hand

Zärschniidu und zärschrecku
zärspränggu und zärschlah
zärschtoru und zärschmättru
tiäwär dini fatscha nu!

Värsteisch nummu d' Sprach vam Chriäg und vam Schwärt
Flattiärundi Wortjini sind diär nix wärt
so striichlut iischchalts Iisu, brännunt diis Gnick
värlah het dich z' Läbu und eu z' Glick

Dü bisch där Sippuschgattär
Där gottvärflüächt Schgattär

Tschebul vor Tschebul
durch chnäwwhochä Morascht
vorwärts, immär vorwärts
durch stockfiischtri Nacht

Durch Gretzä und Gibusul
dum Trejulti nah
ubär Faxä und Grischul
blibu niähnä stah

Schritt vär Schritt
gahni minä Wäg
zum heidnisch Biel, dum heiligu Bärg
durch z' Ahnuland, uf uraltum Wäg
zum heidnisch Biel, dum heiligu Bärg

Tschaggu vor Tschaggu
durch düchli Waldjini
schnaagunt und treelunt ubär d‘ Haaltjini

durch z‘ Zigji ämbrüf und z‘ Stutzji ämab
bisi vor Ärschöpfig nimmä mag

Där Rägu chlepft in d‘ Fatscha
Blitz und Donnärschlag
di Gettär sind schwiirasund
isch das minä letschtusch Tag

Und Dunkulheit umgit mi
där Gejfätsch nimmt mär d‘ Sicht
Zwiiful ubärchunnt mi
isch das z‘ Ändi va minär Läbunsgschicht?

Alli Angscht wiicht pürär Euphorie
Z‘ heidnisch Biel ärschiint ima goldigu Schii
und z‘ Aari ziät schinä Chreis
ubär dum Gipful, am Ziel va minär Reis

Där Rägubogu wiist där Wäg
zum heidnisch Biel, zum heiligu Bärg
und ich gah minä Wäg
zum heidnisch Biel, zum heiligu Bärg

Äs ghoornuts, schüdärhafts Tiär
chunnt vam Gletschär ämbrichär zu diär
z' Bächji tüäht ärteubu
das isch där Rollibock mit du gliäjundu Eugu
an schiinum Fäll chlichjut z' Iisch
Tod und Miseer bringt är nisch
mit Hooru inär Teeri vama Beum
beijinjutär di Gufär, än wahrä Alptreum
beijinjutär di Gufär, än wahrä Alptreum
beijinjutär di Gufär, än wahrä Alptreum

Där Rollibock chunnt...
...schwiirasund heurtär vam Bärg ämbri
...ewwäs unnitz Läbu isch jetz värbii
...nimu z‘ Giätji, z‘ Gädi und eu z‘ Veh
...än hüära Grampoll, jetz is um ew gscheh

Äs ghoornuts, schüdärhafts Tiär
chunnt vam Gletschär, ämbrichär zu diär

Was willt de nu meh
dü tüäsch miär so weh
säg, was hani diär gitah
was tüäsch dü miär a?

Ich bi d' Stimm va där Natür
und so redi zu diär
kei Mänsch värsteit meh mini Sprach

Äs weiss doch jedä Püür
wenn nit lotzusch zär Natür
liggunt d' Mättultini brach

Dü hesch mich värgässu
will nimmä losusch mit dum Härz
dü hesch mich värgässu
so värchusch dü z‘ gspiru
minä teifschtusch Schmärz
minä Schmärz
minä Schmärz

Was willt de nu meh
dü tüäsch miär so weh
säg, was hani diär gitah
was tüäsch dü miär a?

Ich bi d' Stimm va där Natür
und so redi zu diär
kei Mänsch värsteit meh mini Sprach

Äs weiss doch jedä Püür
wenn nit lotzusch zär Natür
liggunt d' Mättultini brach

Dü hesch mich värgässu
will nimmä losusch mit dum Härz
dü hesch mich värgässu
so värchusch dü z‘ gspiru
minä teifschtusch Schmärz
minä Schmärz
minä Schmärz

das isch där Rollibock, mit du gliäjundu Eugu
an schiinum Fäll chlichjut z‘ Iisch
Tod und Miseer bringt är nisch
mit Hooru inär Teeri vama Beum
beijinjutär di Gufär, än wahrä Alptreum

Was himmulhoch ärrichtut
mit einär Chnälli värnichtut
was gibuwwt üs Holz und Stei
zärsteubut mitama uhüära Gschrei
was vär d‘ Ewigkeit soll stah
tüät är eugublicklich zärschlah
Müäma, Ettro, Gvattärmaa
keinä cha dum Rollibock entgah

Dü hesch alls tärfu näh
hantär sovil gigäh
vil meh nu wa dü brüchsch zum läbu

Numeh hesch dü wellu
nummu zum värtwellu
dinä ändlos Hungär frisst mi üf

Dü hesch greubt und gitetut
ich bi üsgibliätut
säg, warum tüäsch mär das a?

Am Rhonestrand, im bärgigu Land
da läbä wiär, stärbä wiär, chrampfä Hand in Hand
mächtigi Bärgä, himmulhoch schii stehnt
Schicksal va allu, wa chämunt und wa gehnt

Tylangir...
...heissä wiär, äs Volch so frii wiä d' wiltu Tiär
...sägunsch iisch, unzähmbär wiä d' Natür hiä isch

Teif värwurzlut wiä d' chnorzigu Beijm
vogulfrii wiä imä hibschu Treum
kämpfa wiär, vär z' Chind und vär z' Wiib
bis kei einzigä va iisch meh bliibt

Schii lüägt mi a
mit grossu Eugu
schii lüägt mi a
mit gufäraltu Eugu
so stahni da
än armi Seel
bi där Schmidja
uf där Alpa zu Bel

Schoch d' alt Schmidja spinnt noch
Schoch schoch d' alt Schmidja läbt noch
Schoch schoch schi spinnt ja immärnoch
Schoch d' alt Schmidja läbt noch

Schii lotzt mi a
mit priäfundu Eugu
schii lotzt mi a
mit freegundu Eugu
so stahni da
bi där Schmidja
will zu ihra gah
in irusch Hitta

Schii kehrt mi, schii gspirrt mi, schii redut mi a:
"Chum ichär, in d‘ Wermi, tüäh miär nix a"
Schii spinnut und bättut und lotzut vär iisch
d‘ armu Seelä, wa biässunt im Gletschäriisch

Bi gfangu inär Zwischuwält
vadu Läbundu bin ich gitrännt
inär Einsamkeit vär d‘ Ewigkeit
inär Fiischtärnis, inär Dunkulheit

Värloru im schwarzu Land
gkleidut im Totugwand
biässich bis d‘ Ärleesig chunnt
liidu Qualä Stund um Stund

In dischum Momänt, im Hiä und im Jetz
Sowahri der bi wani bi

So red ich zu ew oh iär heiligu Chräft
Inär Obär-, Mittul und Unnärwält

Ärwachät iär heiligu Mächt
Kherät miis Gibät

Dass z Härz iisch immär leitut
Und d Liäbi iisch stets bigleitut
Durch d stockfiischtär Nacht

Där schwarz Tänzär ladut zum Tanz zär Tämpärnacht
Är spillt schiis Hackbrätt, dass nummu so tätscht und chlepft und kracht
Gitrunggi Purschtä und spitzi Wiibär, wächär chas nimmä sii
Iär jungu Schnüüfär, sägät kehrät iär die sindhaft Melodie?

Äs Neeschi graaglut ufä Holdärstrüch und lotzt durch z Pfeischtär i
Äs gehnt mu di Grimä so eppis hets schiinä Läbtag nu niä gseh

Altvättrisch gchleiduti, bleichi Lit, mit Riiffu ufu grawu Haar
Schwäbunt tanzunt an ihmu värbii, sind tot siit hundärt Jahr
Pletzli packt nu än chnochigi Hand am Gwand, und äs Totji redut nu a, das isch där Totutanz und jetz bisch eu dü Teil därva, jetz chusch dra!!!

Im ganzu Land wird gitanzt, und inu jungu Liit brännts
Vor Liiduschaft und Luscht, där Obrigkeit zum Fruscht

Där schwarz Tänzär spillt schiis Brätt und lacht…das isch där Totutanz!!!

Chum zu iisch, wehr di nit, bliib bi iisch vär immär und ewig
Chum zu iisch, wehr di nit, bliib bi iisch, sii tot, unselig

Chämät Briädär und Schwesträ, tanzät mit iisch där Totutanz, di altu Gschichtä mächunt keinum Mänsch meh wirklich Angscht/heid iär Angscht?

Där schwarz Tänzär spillt schiis Brätt und lacht
Und elendlichs Gipeeg zärschreckt d unheilig Nacht

Mit Sägässa, Gablä und Agschini
Und dum Häxuhammär chämunt schii
Zär Griäs-Chumma wa där Werwolf läbt
Sig ä beeschä Häxär mima Tiifulspakt

Där Manut ärschiint in vollär Pracht
Äs mächtigs Gheul ärteent um Mittärnacht
Wäxlu di Gstalt, z Tiär in miär ärwacht
Mim sägschtu Sinn folgi där innär Stimm
Uf Schritt und Tritt, das isch där Wolfsritt!

Va Mänschufleisch tüäht är treumu
Wiär wissäs haargenau
D liäbu Schafjini tüäht är nisch reubu
Das hüära Blag khert hiä eifach nit dar!

Vor Urzytä heiwär zämu gjagt
Jetz machsch dü Jagd uf mich
Äs Band va Wiisheit het iisch värbundu
Doch d Angscht vor där Wildnis leitut dich

Gross, so gross isch d Angscht in diär
Wild so wild isch där Wolf in miär

Mördär!
Das gsehsch dü in miär, doch ich gseh minä Brüädär in diär
Mördär!
Das bisch dü wordu, durch minä Tod ufum Schiitärhüfu…

Värdrängt, dezimiärt und kontrolliärt
D Natür im Mänsch isch zivilisiärt
Panik herrscht und d Manie regiärt
Wenn där Wolf in miär ew zfirchtu lehrt

Där Manut ärschiint in vollär Pracht
Doch keis einizigs Gheul ärteent meh um Mittärnacht
Miis Rudul liggt tot am Bodu vor miär
Ach Brüädär, so säg mär, was isch bloss wordu üs diär…

Äs bildhibs blüätjungs Wiibärli
Isch zär Tavärna Wirti gsi
D hoochu Herru sind schampar schalüüsi
So äs Wiibuvolch khert hiä eifach nit hi

Beeschä Hängärt kursiärt wemu nit pariärt
Mu seit mu kherä allärlei im Deerfji
Äs sig än Miäda, än Tampa, än värwännti Rälla
Än Tschampärneesa, än Cügga, än gittigi Schgälla

Johanneli Fii, isch zär Tavärna Wirti gsi
Heigä Wassär gigäh statt Wii
Müäss jetz inu chaltu Wassär sii

Z Fittla und z Gäld regiärunt d Wält
Gspaltni Zungä sind scherfär als a jedäs Schwärt
Jedäs Buwgriti, jedi Gädihäx
Weiss Bscheid vam Johanneli-Grätsch

Schii tiägä pschiissu, panschu, profitiäru
Äwäg mit dem Blag, schii müäss jetz stärbu
Di Quella soll värgah, inär Tavärna
Kei Gascht wird meh chu und gah

In minum chaltu Grab geischtrich umanand
Ins Tooturiich värbannt
Müäss schmachtu vär Sindä wani niä ha bigangu
Weiss Gott…
…schi hent mi hinnärgangu
…d hoochu Herru hent mi hinnärgangu

Provoziärt, schigganiärt und denunziärt
Värgwaltigt, traktiärt und massakriärt
Johanneli Fii stah üf, d hoochu Herru hent üsgidiänt

Johanneli Fii, dü bisch jetz äntli frii
Schi hentär Urächt gitah…
…chasch in d Ärleesig gah
…chasch zrugg in d Friiheit gah

Där Lämmärgeiär vam Rotu Bärg
Stosst zär Ärda vam Himmulszält…
…där Totuvogul so het mu gseit,
heigä äs (peeggunds) Jungi därvagitreit
…äs geit än iischuchaltä Wind
D Chräwjä goorunt im Bidul vam peeggundu Chind

Anär Waldisklamm zu Goppustei
Värnimmt mu äs himmultrüürigs Gschrei
Das isch där grüsig Chnochubrächär am Firmamänt
Är jagtär d Angscht durch March und Bei…durch March und Bei

Nah dum Gwehr und dum Gift isch z Gottesmannji chu
De het mu frommi Spruchjini värnu
Doch z Chriiz und där Sägu, sind ditzmal värgäbu
Där Geiär laht nu wiän Ox am Bärg la stah…und redut nu a!

Inär Zwiisprach wird dum Geischtlichu de sofort klar
Äs sälbär sindigt meh wa nummu har und dar
Wiä im Spiägul gsehts schiini Ubärheblichkeit
Und schämt schich, var d Arroganz vadar Mänschheit!

«1887 isch där letschtusch Bartgeiär, z alt Wiib, ama värgiftutu Fuxkadavär elendlich z Grund gangu. Är het keinär Mänschuseel äswas z Leid gitah, doch d Angscht vor där wiltu Natür het z Nooluvolch värbländut»

Ärkänn dich sälbär, arms Mänschuchind
Dü meinsch dü gsehgäsch, därbii bisch dü blind, so blind, so blind...

Där Lämmärgeiär vam Rotu Bärg
Isch zrugg und chreist am Himmulszält
D Ärkänntnis weegut schwer, doch was wahr isch isch wahr
Där Mänsch isch schich sälbär und dum Läbu di greegschtusch Gfahr, was wahr isch isch wahr!

Friänär het mu talüf und talab ä schuppu Nattru- und Lindwurmheelina kännt
So isch de eu d Red gsi vam Nattruloch
wa dum Deerfji Natärsch schiinä Namu het gigäh

Da heigä än schadhaftä Drachu ghüüsu
und ja, friilitä…äs sig äs furchbar beeschs Viich gsi, wa d Luft mit schiinum giftigu Atum värpeschtut heigä

Abär nit wägu deschi hent nu d edlu Geuchä wellu maniäru
Nei...Vilmeh hets schi värzännt nachum Gold wa unnär du Chräwwjä vadär Nattra gliggu isch
Und äso hent d edlu Geuchä där Nattruflüäch uf schich gizogu…

Mit Heldumüät im Härz, kei Angscht vor Liid und Schmärz
galoppiärunsch uf flinggu Reschini
Uf saguhaftu Wägu, dum sichru Tod entgägu
ufu Sattlä, naivi Cränggini

Z Drachugold im Grind, gläubigi wiä Chind
D Rischtig und d Waffä liggunt schweer
Jedi Schlanga, jedä Wurm, wird Opfer va dem Sturm
Uf heiligär Mission gägu z Ibul, chriiz und quer

Z Drachugold vam Heiduloch
het d edlu Geuchä värfiährt
Där Nattruflüäch värpeschtut z Gmiät
…va dem wa Riichtum bigehrt
…va dem wa d Macht bigehrt

Wilduwiäschti Kämpf, in iblu Drachudämpf
Chnochä und Blüät wohimu lüägt
Der Chriäg isch nit värgäbu, schi hoffunt uf dä Sägu
Där Nattruflüäch nimmt nu d Läbunsglüät

Äscha zu Äscha und Steub zu Steub
Im Bärg, im See, im Himmul, herrscht di gfliglut Vipra wa Fiir spewwt
Äscha zu Äscha und Steub zu Steub
Där Lindwurm iäbt Värgältig, bis d Wält in Flammä steit

Instrumental

Gibundu an där Körpär, wandlut minä Geischt
imä Gfäss üs Chnochä und Fleisch
Uf där Süächi nachum Si, fregimi was ich bi
va wa chumi, wa bini, wa gahni hi?

Welä Tod müäsi numal stärbu, wiävil Ziitä nu durchläbu
wiä äs Rad wah ewig drehjut und dreht
Stetigs Wärdu und Värgah, äs Anäh und Lagah
jedä Atumzug ärinnrut mich dadra

Hesch dü dich schomal gfreegt, was passiärt mit diär?
Wenn dü stirbsch, wenn dü geisch, wenn dü iisch värlahsch, was passiärt mit diär?

In dischär Form hiä bini gfangu, inär Schweeri bliibu bhangu
doch äs ziäht mi ä wäg, wiit ä wäg va hiä…
Üsär Dunkulheit ins Liächt, ind Ärleesig zrugg ins Liächt, will ä wäg va hiä, wiit ä wäg va hiä...

Hesch dü dich schomal gfreegt, was passiärt mit diär?
Wenn dü chusch und ärwachsch uf dischär Wält, was passiärt mit diär?
Hesch dü dich schomal gfreegt, was passiärt mit diär?
Wenn dü stirbsch, wenn dü geisch, wenn dü iisch värlahsch, was passiärt mit diär?

Ohni Widärstand, ohni Entgäguha, lah mi la fallu, lah mi la gah
tüäh där Körpär zärstücklu, zärschlah
Striifu ab das stärblich Gwand, lotzu übär dä Rand
värliäru d Identität, finnu än niwwi Realität
D Värganguheit isch tot, di Züäkunft bringt Not
z Gheimnis liggt värborgu im Momänt
Än Schritt durch dischi Port, bringt mi an än Ort, unbischriblich mit mänschlichu Wort
Nit griifbar mit du Händ, unbigriiflich mim Värstand, wiä än Flamma wa ewig brännt
Das Läbu isch sovil meh, wa wiär mit du Eugu gseh, si treumundi inära Illusion...
Vam erschtu bis zum letschtu Atumzug... ODEM!!! (4x)

Obärhalb va Zermatt hets friänär äs värborgus Tälli gigäh
D Rogguachärlini hent nummu gat äso gstrahlut vam goldigu Roggu und di Gämschini sind ballufeisti gsi
D Escht vadu Obschtbeumjini sind ufä Bodu ghangu va baru Fricht, äs isch z Land gsi wa Milch und Hunig isch gflossu…
Abär pletzli het z Wättär afa cheeru und Jahr vär Jahr isch där Wintär friänär chu
Där Schnee isch nimmä gschmolzu und di Gletschrä hent afa waxu
D Liitjini hent gwissu, z Ändi isch chu und äs het nu afa firchtu, äs het nu afa firchtu…

Där Wintär isch vil zfrüah chu
Und het alls wa läbt mit schich gnu
Di Zwätschgä, d Chriäsbejm, di Triibuul, alläs geit kaputt
Där Teifmattgletschär frässut z Deerfji Zmutt

Di Giätjini, d Waldjini, d Mättultini, alls nimmt är nisch
Und herrscht ubär schiis Riich üs ewigum Iisch
Alls ärstickut unnär schleguldickum Schnee
Z värloru Tälli het niämeh swels gseh
Z goldig Ziitaltär isch jetz värbii
Kei Spur bliibt va iisch, cha das wirkli sii?
So solls sii…

Bim Abusitz hentsch düäzumal gseit
äs gufäralts Mannji heigä prophezeit
Wenn äs zum drittu Mal bim Theodulpass steit
iischi Wält im Iisch unnärgeit

Wiit und breit nix wa Läbu in schich treit
alls isch stei und bei gfrorus
Iischi Opfär und Gibät hent värseit
hopfu und Malz isch värloru

Där Gletschär spewwut Mänschuchnochä üs
chriiduwiiss wiä där Tod
D armu Seela schwäbunt ubär dum Iisch
chlagund ubär irusch Not